Foto: Qeveria e Malit të Zi / Vlada Crne Gore
Ministrja e Punëve Evropiane, Maida Gorçeviq, ka nënshkruar sot Marrëveshjen Financiare për programin shumëvjeçar IPA që mbulon periudhën deri në vitin 2027.
Për Malin e Zi janë përcaktuar gjithsej 46,1 milionë euro, prej të cilave 45 milionë euro janë kontribut i Bashkimit Evropian, ndërsa pjesa kombëtare e kofinancimit arrin në 1,12 milionë euro.
Mjetet e këtij programi do të orientohen në reformat që përbëjnë thelbin e progresit në negociatat e anëtarësimit: sundimin e ligjit, administratën publike, arsimin, menaxhimin ekonomik, digjitalizimin dhe forcimin e kapaciteteve institucionale.
Gorçeviq falënderoi BE-në për mbështetjen e vazhdueshme, duke theksuar se ajo është nxitje e rëndësishme për përshpejtimin e rrugëtimit evropian të Malit të Zi.
Ajo u bëri thirrje të gjitha institucioneve që të përgatisin me kohë dokumentacionin e projekteve dhe të dorëzojnë informacionet e nevojshme për të siguruar zbatim efikas dhe transparent të fondeve IPA.
Programi përfshin gjithashtu asistencë teknike për harmonizim me acquis të BE-së, forcimin e kapaciteteve të vetëqeverisjes lokale, përmirësimin e menaxhimit të fondeve dhe aktivitete të informimit të publikut për procesin e integrimit evropian.
Fusha të veçanta vëmendjeje janë barazia gjinore, statistika, shëndetësia, sektori financiar, zhvillimi i Ndërmarrjeve të Vogla dhe të Mesme dhe menaxhimi i qëndrueshëm i burimeve natyrore.
Gorçeviq theksoi se miratimi i dokumentit konfirmon përkushtimin e plotë të Malit të Zi ndaj agjendës evropiane dhe rrit dinamikën e procesit të anëtarësimit.
Për herë të parë, programi është hartuar përmes programimit të përbashkët të tre instrumenteve në kuadër të IPA III, gjë që dëshmon nivel të lartë koordinimi me BE-në.
Marrëveshja paraqet bazën për përdorimin e fondeve të përcaktuara nga Komisioni Evropian përmes Instrumentit të Integrimit Evropian (EUIF) dhe Instrumentit të Mbështetjes së Reformave (EURF), duke siguruar vazhdimin e mbështetjes së fortë të BE-së për proceset reformuese në Mal të Zi.
Pas miratimit të Qeverisë të enjten, me nënshkrimin e sotëm, fondet e IPA-s bëhen zyrtarisht të përdorshme për Malin e Zi.
