Foto: Ilustrim
Sipas raportit të ri të Bankës Botërore, ekonomitë e vendeve të Ballkanit Perëndimor po përballen me ngadalësim të rritjes gjatë vitit 2025, me një rritje mesatare të parashikuar të PBB-së prej 3.0%, në krahasim me 3.6% në vitin 2024. Ky ngadalësim i atribuohet kombinimit të sfidave globale dhe presioneve të brendshme në disa vende.
???? Serbia pritet të ketë rënien më të madhe të rritjes nga 3.9% në 2.8%, për shkak të rënies së investimeve të huaja, krizës në ndërtim dhe kushteve të pafavorshme klimatike që kanë goditur bujqësinë.
???? Mali i Zi përballet me inflacion më të lartë se parashikimet dhe me presion nga borxhi i jashtëm. Rritja ka ngadalësuar ndjeshëm pas rimëkëmbjes post-pandemike. Vendi mbetet i ndjeshëm ndaj ndikimeve të jashtme, për shkak të varësisë nga turizmi.
???? Kosova, ndonëse me rritje më të ulët në krahasim me 2024 (nga 4.4% në 3.8%), mbetet ndër vendet me performancën më të mirë në rajon. Megjithatë, papunësia vazhdon të jetë problem, dhe të ardhurat për frymë janë vetëm 15% e mesatares së BE-së.
???? Bosnja dhe Hercegovina përballet me inflacion të lartë dhe prodhim të dobët industrial. Papunësia është ende e lartë dhe shumë qytetarë mbeten ekonomikisht të brishtë.
???? Shqipëria pritet të ketë një rritje prej 3.7%, të nxitur kryesisht nga ndërtimi. Banka Botërore thekson rëndësinë e reformave, stabilitetit fiskal dhe forcimit të lidhjeve me tregjet e BE-së.
???? Maqedonia e Veriut është e vetmja që pritet të shënojë përshpejtim të rritjes në vitin 2025 (në 3.1%), falë rritjes së investimeve dhe eksportit.
Problemi i përbashkët i rajonit mbetet tregu i punës, me mungesë fuqie punëtore dhe njëkohësisht papunësi të lartë – mbi 10%. Gratë, të rinjtë dhe të moshuarit përballen me vështirësi më të mëdha në punësim. Popullsia në moshë pune pritet të bjerë me 20% deri në vitin 2050.
