Sindikatat italiane thirrën një grevë të përgjithshme për të premten, në solidaritet me flotiljen ndërkombëtare të anijeve të ndihmës për Gazën, ndërsa protestat shpërthyen në disa qytete vonë të mërkurën, pas raportimeve se anijet ishin ndaluar nga ushtria izraelite.
Në qytetin jugor të Napolit, demonstruesit hynë në stacionin kryesor hekurudhor dhe ndaluan trafikun e trenave, ndërsa policia rrethoi stacionin Termini në Romë, pasi protestuesit u mblodhën pranë hyrjeve.
Flotilja Globale Sumud, që përbëhet nga më shumë se 40 anije civile me rreth 500 parlamentarë, avokatë dhe aktivistë në bord, përfshin edhe një kontingjent italian. Ajo ka për qëllim të thyejë bllokadën izraelite ndaj Gazës, duke dërguar ilaçe dhe ushqime, pavarësisht paralajmërimeve të përsëritura për t’u kthyer prapa.
“Agresioni kundër anijeve civile me qytetarë italianë në bord është një çështje jashtëzakonisht serioze,” thanë sindikatat italiane duke shpallur grevën.
Ky njoftim vjen pas një greve të përgjithshme të mëparshme në mbështetje të Gazës më 22 shtator, e cila u shoqërua me përplasje në Milano.
Në qytetin veriperëndimor të Xhenovës, sindikatat njoftuan bllokimin e portit dhe bënë thirrje për mbledhjen e protestuesve në orën 22:00 në njërën nga hyrjet kryesore.
Gjatë dy javëve të fundit, punëtorët italianë të portit që protestojnë kanë penguar ankorimin dhe ngarkimin e anijeve të ndryshme, duke synuar ato që, sipas tyre, janë të përfshira në tregti me Izraelin.
Ministri i Jashtëm i Italisë, Antonio Tajani, tha më parë se homologu i tij izraelit e kishte siguruar se forcat e armatosura izraelite nuk do të përdornin dhunë kundër aktivistëve në bord të flotiljes.
Protesta në mbështetje të flotës së ndihmës për Gazën dhe kauzës palestineze janë mbajtur dhe pritet të mbahen në shumë qytete evropiane, si dhe në Kolumbi.
