Një valë 16-ditore të nxehti që përfshiu Spanjën këtë muaj ishte “më intensivja e regjistruar ndonjëherë”, sipas agjencisë shtetërore meteorologjike të vendit, AEMET.
Të dhënat paraprake për valën e të nxehtit, e cila filloi më 3 gusht dhe përfundoi më 18 gusht, tejkaluan rekordin e mëparshëm të vendosur në korrik të vitit 2022.
Sipas AEMET, temperatura mesatare gjatë kësaj vale ishte 4.6°C më e lartë krahasuar me valët e tjera të mëparshme.
Vala e të nxehtit në gusht përkeqësoi ndjeshëm kushtet për zjarret në vend, duke nxitur shpërthimin e disa zjarreve që vazhdojnë të shkatërrojnë zona të tëra në veri dhe perëndim të Spanjës.
Sipas një vlerësimi të publikuar së fundmi nga Instituti i Shëndetit Carlos III, mbi 1,100 viktima në Spanjë janë lidhur me këtë valë të nxehti.
Që nga fillimi i regjistrimeve në vitin 1975, AEMET ka dokumentuar 77 valë të nxehti në Spanjë.
Nga këto, gjashtë kanë shënuar rritje të temperaturës prej 4°C ose më shumë mbi mesataren – pesë prej tyre janë regjistruar që nga viti 2019.
Shkencëtarët paralajmërojnë se kriza klimatike po shkakton valë të të nxehtit gjithnjë e më të gjata, më intensive dhe më të shpeshta në mbarë botën.
AEMET bëri gjithashtu të ditur se një periudhë 10-ditore brenda kësaj vale përmbante 10 ditët më të nxehta radhazi të regjistruara ndonjëherë në Spanjë që nga të paktën viti 1950.
Agjencia theksoi se tani është “një fakt shkencor që verat e sotme janë më të nxehta se ato të dekadave të mëparshme”.
