Foto: Facebook/Genci Nimanbegu
Kryetari i Komunës së Ulqinit, Genci Nimanbegu, me rastin e votimit të marrëveshjes midis Malit të Zi dhe Emirateve të Bashkuara Arabe, tha se beson fuqimisht se jo vetëm Presidenti i Shtetit Jakov Millatoviq dhe autoritetet më të larta shtetërore, por edhe institucionet ndërkombëtare dhe evropiane, do të qëndrojnë në anën e ligjit – në anën e qytetarëve – me qëllim mbrojtjen e lirisë, të drejtës së pronës dhe trashëgimisë së përbashkët.
“Ulqini nuk është vetëm një destinacion turistik. Është një vend me histori, kulturë dhe identitet të thellë, i lidhur ngushtë me tokën dhe detin që na lanë paraardhësit tanë. Plazhi i Madh, për të cilin zërat tanë ngrihen sot, nuk është vetëm një hapësirë gjeografike – është një simbol i qëndrueshmërisë sonë, i angazhimit tonë për të mbrojtur atë që është e jona dhe të ardhmen që duam të ndërtojmë për fëmijët tanë”, tha Nimanbegu.
Në këtë moment kritik, siç pohon ai, është e nevojshme të ruhet uniteti – jo vetëm politik, por edhe, më e rëndësishmja, uniteti civil.
“Ky është çelësi i forcës sonë. Ashtu siç dinim të ishim të bashkuar në të kaluarën për Valdanosin dhe Kriporen, edhe sot duhet të jemi të bashkuar për Plazhin e Madh”, tha Nimanbegu.
Gjithashtu, siç shprehet Nimanbegu, jemi në prag të një sezoni turistik i cili pritet të jetë jashtëzakonisht i suksesshëm, prandaj u bën thirrje të gjithë qytetarëve, sektorit privat, institucioneve dhe çdo individi që është në gjendje të kontribuojë, që të punojnë së bashku për ta përgatitur Ulqinin për një sezon të suksesshëm, të sigurt dhe dinjitoz.
