Foto: Qeveria e Malit të Zi / Vlada Crne Gore
Ministri i Administratës Publike, Marash Dukaj, ka hapur sot një tryezë të rrumbullakët për zhvillimin e Planit të Veprimit 2025-2026 mbi Strategjinë e Reformës në Administratën Publike.
“Kam kënaqësinë që kam rastin t’ju përshëndes në emrin tim dhe në emër të të gjithë politikëbërësve, përpjekjet e të cilëve na kanë bërë të mundur që sot të kemi një dokument veprimi që është krijuar në një mjedis gjithëpërfshirës dhe me një shkallë të lartë të përfshirjes së institucioneve kompetente, si dhe të publikut të interesuar”, tha Dukaj.
Ai theksoi se ky dokument paraqet një hap të rëndësishëm drejt përmirësimit të punës së institucioneve tona, përshpejtimit të transformimit digjital, por edhe decentralizimit të vetëqeverisjes lokale, krijimit të një administrate publike profesionale dhe të depolitizuar, të gjitha me synimin për t’i ofruar qytetarëve një sistem të administratës publike efikase, të hapur dhe të aksesueshme.
Ministri Dukaj tha se reforma në administratën publike është një sfidë administrative që kërkon mbështetje të fuqishme politike dhe bashkëpunim nga të gjitha institucionet, për këtë arsye klasifikohet në grupin I – të drejtat themelore në procesin e anëtarësimit të Malit të Zi në Bashkimin Evropian, dhe shtoi se ky është një proces i rëndësishëm jo vetëm për qytetarët dhe ekonominë, por edhe për punonjësit në administratën publike, sepse pa kapacitete administrative cilësore nuk mund të ketë përparim në kapitujt e tjerë të negociatave.
Jemi përballë shumë sfidave sepse, siç e dini, prej vitesh Raporti i KE-së ka treguar se nuk ka pasur progres në fushën e reformës së administratës publike.
Dukaj theksoi se në periudhën paraprake janë ndërmarrë një sërë aktivitetesh për përshpejtimin e proceseve reformuese në reformën e administratës publike.
“Javën e kaluar është miratuar Projektligji për nëpunësit civilë dhe punonjësit, i cili është në përputhje me standardet e BE-së sa i përket profesionalizimit të nëpunësve civilë, ka filluar një proces i madh lidhur me decentralizimin e pushtetit lokal, po punohet intensivisht për ngritjen e shërbimeve të reja elektronike për qytetarët, është përgatitur Projektligji për Qeverinë dhe për herë të parë publikisht dhe në mënyrë transparente janë publikuar të dhënat për numrin e të punësuarve në administratën publike, të cilat përditësohen çdo tremujor”, tha Dukaj.
Ai theksoi se ka ende shumë punë për të bërë dhe shumë sfida që duhet të adresohen në periudhën e ardhshme për të përmbushur të gjitha obligimet deri në fund të vitit 2026.
“Inkorporimi i teknologjive të reja, digjitalizimi, forcimi i kapaciteteve të administratës shtetërore dhe përmirësimi i profesionalizimit të punonjësve janë vetëm disa nga hapat që do të ndërmarrim për të krijuar një administratë publike moderne, të shpejtë dhe të përgjegjshme”, tha Dukaj. Siç shtoi ai, ajo që është veçanërisht e rëndësishme për ne është hapja e procesit të zhvillimit të këtij Plani të Veprimit.
