Foto: Qeveria e Malit të Zi / Vlada Crne Gore
Zëvendëskryeministri për Politikë Ekonomike dhe njëherësh ministër i Zhvillimit Ekonomik Nik Gjeloshaj u takua me përfaqësues të Asociacionit të Biznesit Amerikano-Evropian Qendror (ACEBA).
Në takim, përveç anëtarëve të Qeverisë së Malit të Zi, morën pjesë edhe nënkryetari i ACEBA-s, Douglas Devisocki, përfaqësues të kompanive amerikane, si dhe ambasadorja e Shteteve të Bashkuara të Amerikës në Mal të Zi, Judy Rising Reinke.
Zëvendëskryeministri Gjeloshaj i uroi mirëseardhje delegacionit amerikan, duke theksuar marrëdhëniet e shkëlqyera mes Malit të Zi dhe Shteteve të Bashkuara.
Ai theksoi se marrëdhëniet e forta dypalëshe paraqesin bazën për përmirësimin e mëtejshëm të bashkëpunimit ekonomik.
“Vizita e kompanive amerikane në Mal të Zi është një ngjarje e rëndësishme që paraqet një mundësi të jashtëzakonshme për të përmirësuar lidhjet ekonomike midis vendeve tona. Ky takim afirmon më tej marrëdhëniet e partneritetit dhe hap hapësirë për bashkëpunim konkret zhvillimor dhe investiv në përputhje me Memorandumin e nënshkruar”, tha Gjeloshaj.
Ai gjithashtu theksoi se investimet amerikane janë të një rëndësie të veçantë për Malin e Zi, jo vetëm për shkak të potencialit të tyre ekonomik, por edhe për shkak të vlerave që promovojnë.
“Qeveria e Malit të Zi do të jetë një partner i besueshëm dhe i përkushtuar për të gjithë investitorët e besueshëm amerikanë”, shtoi Gjeloshaj.
Nga ana tjetër, ambasadorja e SHBA-së në Mal të Zi tha:
“Kemi kënaqësinë të mirëpresim kompani të shumta të njohura amerikane në Podgoricë. Këto kompani përfaqësojnë marka të forta amerikane në një sërë sektorësh, duke përfshirë financat, infrastrukturën, mbrojtjen, sigurinë kibernetike, energjinë, sigurinë kufitare dhe kujdesin shëndetësor. Ne presim me padurim partneritetet dhe mundësitë që do të lindin nga forcimi i mëtejshëm i lidhjeve tona ekonomike.”
Bashkëbiseduesit vlerësuan se statusi i Malit të Zi si anëtar i NATO-s, së bashku me procesin e vazhdueshëm të integrimit evropian, dërgon një sinjal të fortë besimi për investitorët amerikanë dhe të tjerë ndërkombëtarë.
Gjatë takimit u bisedua për mundësitë për përmirësimin e bashkëpunimit dhe investimet e mundshme në sektorët e infrastrukturës, energjetikës, turizmit, shëndetësisë, teknologjisë dhe energjisë së gjelbër.
Po ashtu, gjatë takimit u ra dakord për vazhdimin e komunikimit dhe intensifikimin e bashkëpunimit në fushat me interes të përbashkët.
