Foto: Kuvendi i Malit të Zi / Skupština Crne Gore
Deputetët e Kuvendit të Malit të Zi kanë shqyrtuar sot Projektligjin për buxhetin për vitin 2025.
Ministri i Financave Novica Vukoviq theksoi se ata kanë përgatitur një plan gjithëpërfshirës, të qëndrueshëm dhe real dhe deputetët e shumicës parlamentare pajtohen që ky dokument të miratohet sa më shpejt.
Vukoviq theksoi se procesi i buxhetimit kërkon përkushtim dhe gjithëpërfshirje dhe se Ministria ofron dhe propozon atë që është e mundur dhe e qëndrueshme.
Ky plan buxhetor, siç thotë ai, bazohet në rezultatet e vitit të kaluar.
“Ne rregullisht e kemi servisuar çdo gjë që vinte për pagesë, si në komuna dhe kompani, ashtu edhe në ato që kanë falimentuar. Gjithçka që vjen për servisim është e përfunduar, kemi financim të qëndrueshëm dhe të ardhurat e njëhershme, të cilat janë të mirëseardhura, nuk janë burimi kryesor i financimit. Duhet të flasim për borxhet, sepse në këtë periudhë 2025 dhe 2026 janë për arkëtim dhe borxhi është në nivelin 3.5 miliardë euro dhe mund të themi se më në fund po menaxhohen me përgjegjësi”, tha Vukoviq.
Nënkryetari i Kuvendit të Malit të Zi Nikollë Camaj vuri në dukje se buxheti i vitit 2025 është dëshmi se mazhoranca në pushtet mendon ndryshe për zonat ku pakicat përbëjnë shumicën, dhe ku nuk janë bërë investime në periudhën e mëparshme.
Siç ka theksuar ai, çdo vonesë në miratimin e këtij dokumenti është e dëmshme për realizimin e investimeve kapitale dhe për nevojat e qytetarëve.
“Meqenëse përpjekja për të arritur një kompromis me opozitën dështoi, ne duhej të gjenim një mënyrë për të zhbllokuar parlamentin dhe për të vazhduar punën. Përpara nesh ka shumë ligje, por ky është sigurisht më i rëndësishmi. Shqiptarët, edhe zonat ku jetojnë pakicat, po përjetojnë përmirësime çdo ditë, dhe ky buxhet parashikon më shumë investime. Do të veprojmë me amendamente për të përmirësuar disa gjëra, sepse përfaqësuesit e qytetarëve e dinë më së miri se ku duhet të investohet. Unë kam qenë modest në kërkesat e mia, por kam kërkuar ndihmë për kompletimin e objektit të trashëgimisë kulturore të Malësisë dhe për Kohën Javore të ndahen më shumë mjete se vitin e kaluar. Jam i bindur se me këtë buxhet do të bëhet shumë më tepër dhe se askush nuk do të jetë kundër miratimit të tij”, tha Camaj.
