Foto: ResPublica
Bashkimi Evropian (BE) ka njoftuar një paketë të re ndihme humanitare me vlerë 148 milionë euro për Ukrainën e shkatërruar nga lufta.
Në një deklaratë me shkrim nga Komisioni Evropian, theksohet se afërsisht 12,7 milionë njerëz në Ukrainë kanë nevojë për “ndihmë urgjente” dhe se paketa e re e ndihmës synon të plotësojë këto nevoja.
Në deklaratë vihet në dukje se 140 milionë euro nga paketa totale e ndihmës prej 148 milionë euro u ndanë për ndihmën humanitare në Ukrainë dhe 8 milionë euro në Moldavi.
Pas paketës së re të ndihmës, shuma e ndihmave humanitare të akorduara nga Komisioni Evropian për Ukrainën që nga fillimi i luftës ka tejkaluar 1,1 miliard euro.
Hadja Lahbib, Komisionerja Evropiane për Përgatitjen, Menaxhimin e Krizave dhe Barazinë, në një postim në llogarinë e saj X lidhur me paketën e ndihmës është shprehur se “Me 148 milionë euro ndihma të reja humanitare për Ukrainën ne po ofrojmë mbështetje jetëshpëtuese për njerëzit dhe ndihmojmë në rindërtimin e shoqërive. BE-ja do të qëndrojë me vendosmëri pranë popullit ukrainas në momentin që ata kanë nevojë”.
Ndërkohë Lahbib e cila dje vizitoi Ukrainën për të inspektuar punimet për ndihmën humanitare të BE-së, pritet që të zhvillojë takime me zyrtarë të nivelit të lartë, përfshirë presidentin ukrainas Volodymyr Zelenskyy.
