Zëvendëskryeministri dhe ministri i Punëve të Jashtme Ervin Ibrahimoviq mori pjesë në takimin e Ministrave të Punëve të Jashtme të Procesit të Berlinit, i cili shënoi dhjetëvjetorin e kësaj nisme.
Në fjalimet u konfirmua mbështetja e fortë për integrimin e mëtejshëm të vendeve të Ballkanit Perëndimor në Bashkimin Evropian, si dhe u theksua rëndësia e përshpejtimit të procesit të negociatave dhe zbatimit të reformave të nevojshme.
Ibrahimoviq tha se procesi i Berlinit është mekanizmi më efektiv për përgatitjen gjithëpërfshirëse për anëtarësim në BE.
“Mali i Zi mirëpriti dhjetëvjetorin e Procesit të Berlinit si lider në negociata dhe vendi i parë që mori një IBAR pozitiv. Besoj se sot, këtu, do të hedhim themelet për realizimin me sukses të qëllimit tonë të përbashkët – një Evropë të zgjeruar”, shtoi ai.
Ibrahimoviq theksoi se vendeve të Ballkanit Perëndimor tashmë u është ofruar një mekanizëm i jashtëzakonshëm mbështetës këtë vit në formën e një Plani të ri të Rritjes.
“Mali i Zi synon të shfrytëzojë maksimalisht këtë mundësi, si dhe instrumentet e tjera në dispozicion, në mënyrë që të përshpejtojë procesin e integrimit dhe të zvogëlojë hendekun e zhvillimit me BE-në”, tha Ibrahimoviq.
Ai gjithashtu theksoi se për Malin e Zi, marrja e një raporti pozitiv për përmbushjen e standardeve të përkohshme në fushën e sundimit të ligjit, ishte mirënjohje për rezultatet e arritura.
“IBAR-i pozitiv është gjithashtu një nxitje për të dyfishuar përpjekjet tona, pasi hyjmë në fazën përfundimtare dhe më të kërkuar të negociatave, në mënyrë që të bëhemi anëtari i 28-të deri në vitin 2028”, tha Ibrahimoviq.
