Pas gati katër vitesh, flota e njësisë ajrore-helikopterike të MPB-së është funksionale për të ofruar mbështetje për të gjitha repartet, e gjatë verës veçanërisht në fushën e sigurisë në komunikacion dhe mbrojtjes dhe shpëtimit, njoftoi Ministria e Punëve të Brendshme.
Sipas Ministrisë së Brendshme, aktualisht ka një avion zjarrfikës të servisuar dhe gati operacional, dy helikopterë dhe pesë drone, të cilët janë të rëndësishëm për zbulimin e vendit të zjarrit dhe parandalimin e zjarrit.
“Të presësh gati sezonin e zjarreve do të thotë të vësh në dispozicion të gjitha kapacitetet njerëzore, materiale e teknike”, theksojnë ata në njoftim.
Vënia në funksion e helikopterit shumëfunksional paraqet, siç thonë ata, mbështetje të konsiderueshme për patrullat e trafikut në ruajtjen e një gjendje të favorshme të sigurisë në komunikacion në rrugë, veçanërisht gjatë sezonit turistik.
“Jemi dëshmitarë të trafikut të rënduar për shkak të trafikut të madh të mjeteve motorike të pasagjerëve si në jug ashtu edhe në veri të vendit, bllokime të shpeshta dhe fatkeqësisht aksidente të shumta në komunikacion. Me masa adekuate në rrugë, monitorimi i trafikut nga ajri do të kontribuojë në sigurinë më të madhe të qytetarëve dhe turistëve tanë”, thuhet në njoftim.
Ata njoftuan se janë duke vazhduar përmirësimin e kapaciteteve dhe pajisjeve për të ofruar siguri dhe mbrojtje më të madhe për të gjithë qytetarët dhe turistët.
