Si rajon, ne mund të punojmë më thellësisht në tranzicionin e gjelbër dhe zbatimin e Planit të Gjelbër Evropian, tha presidenti i Malit të Zi Jakov Millatoviq në Samitin e dytë rajonal të ESG Adria “Vepro tani për një të nesërme të qëndrueshme”, i cili filloi sot në Tivat.
Millatoviq theksoi se Mali i Zi, Gryka e Kotorrit dhe Tivati janë mjedisi ideal për mbajtjen e një ngjarje kaq të rëndësishme, e cila mbledh një numër të madh ekspertësh dhe liderësh në fushën e ekologjisë, politikës së përgjegjshme shoqërore dhe qeverisjes së mirë korporative.
“Bisedat, idetë dhe përvojat krahasuese që do të kemi mundësinë t’i dëgjojmë në dy ditët e ardhshme janë jashtëzakonisht të vlefshme për vendin tonë dhe i japin atij një vend të rëndësishëm në hartën e qëndrueshmërisë”, tha Millatoviq.
Koncepti ESG, siç theksoi ai, përfaqëson themelet mbi të cilat duhet të ndërtojmë një të ardhme të qëndrueshme për rajonin dhe ekonomitë tona.
“Fakti është se ndryshimet klimatike po ndryshojnë botën siç e njohim ne. Vendi ynë nuk bën përjashtim. Në dritën e të gjitha krizave mjedisore, energjetike dhe ekonomike me të cilat po përballemi dhe përsëritja e të cilave është e sigurt, është e nevojshme të shihet qartë dhe të fokusohet në zhvillimin e qëndrueshëm afatgjatë”, vlerësoi Millatoviq.
Sipas tij, vetë natyra na e lehtësoi dhe na mundësoi, sepse me vetëmohim na shpërbleu me të gjitha thesaret e saj.
“Ne kemi për detyrë ta përdorim me mençuri dhe t’i edukojmë gjeneratat e ardhshme për ta ruajtur atë”, përfundoi Millatoviq, duke theksuar se qeverisja e mirë e korporatave nuk është vetëm një detyrim biznesi, por edhe një faktor kyç për sukses afatgjatë.
