Qytetarët malazezë nga 22 dhjetori deri në fund të vitit kanë dërguar 102 raportime përmes aplikacionit “Ndalohet pirja e duhanit”, 90 prej të cilave i referohen shkeljeve të Ligjit për Kufizimin e Përdorimit të Produkteve të Duhanit në Ambientet Mikpritëse, bëhet e ditur nga Qendra për Monitorim dhe Kërkim (CeMI).
CeMI, në bashkëpunim me organizatën joqeveritare Juventas dhe me mbështetjen e Organizatës Botërore të Shëndetësisë, krijuan aplikacionin “Ndalohet pirja e duhanit”, i cili u mundëson qytetarëve të raportojnë rastet e pirjes së duhanit në ambiente të mbyllura, në kundërshtim me Ligjin.
“Që nga momenti i funksionimit të aplikacionit, më 22 dhjetor, deri në fund të vitit 2023, kemi regjistruar 102 raportime nga qytetarë nga vende të ndryshme të vendit. Numri më i madh i tyre arriti nga Podgorica (28), ndërsa Plevla (20) dhe Nikshiqi (14) gjithashtu regjistruan një numër të madh të raportimeve,” thuhet në njoftim.
CeMI tregoi se aktivitete të rëndësishme qytetare u regjistruan gjithashtu në Rozhajë (6), Berane dhe Herceg Novi (4), Budva dhe Tivat (3), dhe nga dy raportime erdhën nga Bijello Pole, Cetina, Danillovgradi, Kollashini, Kotorri, Plava, Tuzi, Ulqini dhe Zhablaku dhe nga (1) raportim nga Tivari dhe Gucia.
Ata besojnë se ky lloj reagimi tregon ndërgjegjësimin në rritje të qytetarëve për dëmshmërinë e tymit të duhanit dhe përkushtimin e tyre për të krijuar një mjedis më të shëndetshëm jetese.
“Prandaj ftojmë të gjithë qytetarët që të shkarkojnë aplikacionin “Ndalohet pirja e duhanit” dhe të denoncojnë shkeljet e ndalimit të pirjes së duhanit në ambiente të mbyllura. Pjesëmarrja juaj është thelbësore jo vetëm për efektin parandalues të aplikimit, por edhe për drejtimin e organeve të inspektimit në vendet ku ligji nuk respektohet,“ thanë nga Qendra për Monitorim dhe Kërkim (CeMI).
