Pas anulimit të mësimit për shkak të raportimeve për bomba, sot filloi mësimi i rregullt në shkollat malazeze.
Policia ka konstatuar se kallëzimet e rreme janë dërguar nga një fëmijë nga Podgorica.
Shoqata e Prindërve dhe Komuniteti Arsimor thonë se është mirë që u zbulua autori dhe theksojnë se është e rëndësishme që çështja të ndiqet penalisht deri në fund.
“Mendoj se diku është supozuar se janë fëmijë, pra të rinj, sepse ndodh pikërisht në momentin kur mbyllen notat. Kjo ka ndodhur edhe vitin e kaluar, në të njëjtën kohë, por jo vetëm atëherë. Është mirë që ne kemi këtë informacion, por do të jetë edhe më e rëndësishme të dimë se cilat do të jenë pasojat, sepse disi shumë gjëra problematike ndodhin në vendin tonë, por nuk ndjeken deri në fund ose mund të mos ketë edhe llogaridhënie adekuate për të cilën insistohet më vonë. Do të shohim se si do të vendosin gjykatat, gjegjësisht si do ta shikojnë këtë pjesë të ligjit që i referohet neglizhencës së fëmijëve”, tha kryetarja e Shoqatës së Prindërve, Kristina Mihailoviq.
Dje, zyrtarët policorë kanë zbuluar identitetin e fëmijës i cili javën e kaluar ka dërguar raporte të rreme për bomba në shkollat në Podgoricë, Danillovgrad dhe Tivar, njoftoi Drejtoria e Policisë.
Siç thuhet, për shkak të panikut dhe çrregullimit të shkaktuar nga fëmija që ka dërguar e-mailet me përmbajtje kërcënuese, policia do të ngrejë kallëzim ndaj të dy prindërve për shkelje të Ligjit për Mbrojtjen nga dhuna në familje – neglizhencë e fëmijës.
“Kontrollet gjithëpërfshirëse dhe analizat e kryera të telekomunikacionit dhanë informacione për vendndodhjen dhe pajisjen celulare, si dhe një person të mundshëm që dyshohej se kishte marrë pjesë në aktivitetet e dërgimit të kërcënimeve”, thuhet në deklaratë.
