Institucionet kryesore shtetërore do të ofrojnë mbështetje për ndërtimin e termocentraleve diellore fotovoltaike, u njoftua në takimin e zëvendëskryeministrit për Politikë Ekonomike, Nik Gjeloshaj dhe përfaqësuesve të Industrisë së Energjisë Elektrike të Malit të Zi (EEMZ), UGT Renewables dhe Inxhinieri Hyundai.
EEMZ njoftoi se në zyrën e tyre në Podgoricë u mbajt një takim si pjesë e një vizite shumëditore të kompanive të njohura nga Shtetet e Bashkuara të Amerikës dhe Koreja e Jugut në Mal të Zi, me qëllim të ngritjes së bashkëpunimit në një nivel më të lartë, në përputhje me Memorandumin e Mirëkuptimit të nënshkruar më parë.
“Që në një të ardhme të parashikueshme të fillojë zbatimi i punës së përbashkët për projektimin, financimin dhe ndërtimin e termocentraleve diellore fotovoltaike me kapacitet 250 MW, me afërsisht 50/100 MWh për ruajtje të energjisë me mundësi të ndërtimit të sistemeve shtesë të ruajtjes së energjisë elektrike”, thuhet në njoftim.
Gjeloshaj tha se është i kënaqur me faktin se subjekte të tilla të respektuara afariste janë të interesuara për të investuar në sektorin e energjisë malazeze.
Siç ka theksuar ai, është veçanërisht i lumtur që një pjesë e konsiderueshme e projektit do të zhvillohet në territorin e komunës së Tuzit.
“Diçka e tillë sigurisht që do të ketë një efekt të madh në zhvillimin e balancuar ekonomik dhe sigurisht që paraqet një mesazh inkurajimi për kompanitë e tjera të suksesshme, si nga sektori i energjisë ashtu edhe nga fusha të tjera,“ tha zëvendëskryeministri Gjeloshaj.
Në takim morën pjesë Milutin Gjukanoviq nga EEMZ, Adam Cortez nga UGT Renewables dhe Lim Gan Sup (Hyundai Engineering).
Ata, siç u tha, u shprehën të kënaqur me faktin se përfaqësuesit e institucioneve kryesore shtetërore e njohin rëndësinë e projektit, duke theksuar gatishmërinë infrastrukturore për t’iu bashkuar një projekti kaq kërkues.
