Fillimi i vitit shkollor nuk do të shtyhet, kështu që nxënësit do të ulen në bankat shkollore më 4 shtator, siç është paraparë në kalendarin shkollor, tha ministri i Arsimit Miomir Vojinoviq.
Vojinoviq tha se kalendari shkollor tashmë është miratuar siç është propozuar nga Ministria e Arsimit.
“Në këtë moment është e vështirë të thuhet se çfarë mundësish do të ketë në shtator nga njëra anë, por edhe në janar nga ana tjetër, nëse zgjatja e mundshme e pushimeve do të kontribuojë në sezonin turistik, ndaj kalendari është i miratuar në këtë moment, mësimi fillon më 4 shtator, si dhe vitet e kaluara”, ka theksuar Vojinoviq.
Ministri tha se janë siguruar tekste shkollore për nxënësit nga klasa e parë deri në klasën e nëntë.
Duke komentuar masat e marra për të luftuar dhunën e bashkëmoshatarëve, Vojinoviq tha se është bërë shumë dhe se nga 1 shtatori do të rritet numri i psikologëve dhe pedagogëve në shkolla.
Ai tha se aktualisht në shkollat në vendin tonë janë 147 pedagogë dhe 66 psikologë dhe ky numër do të rritet me gati 30 për qind, për 60 pedagogë dhe psikologë.
