Delegacioni i Malit të Zi i kryesuar nga ministrja e Ekologjisë, Planifikimit Hapësinor dhe Urbanizmit, Ana Novakoviq Gjuroviq dhe shefja e Zyrës për Zhvillim të Qëndrueshëm, Aneta Kankarash, po merr pjesë në sesionin e 70-të të Komisionit Ekonomik të Kombeve të Bashkuara për Evropën.
Novakoviq Gjuroviq njoftoi se Mali i Zi mbetet i përkushtuar ndaj zhvillimit me karbon të ulët me aplikimin e teknologjive inovative dhe të gjelbra.
„Kjo do të thotë se ne duhet të jemi gati për një proces shumë kërkues dhe afatgjatë të tranzicionit të gjelbër dhe të drejtë, që nënkupton veprim të koordinuar ndërgjeneror dhe ndërshoqëror. Mali i Zi ka një kornizë strategjike për zhvillim të qëndrueshëm dhe tranzicion rrethor, zbatimi i plotë i të cilit kërkon transformim digjital,“ tha ministrja.
Ajo vuri në dukje se sistemet e informacionit që ne përdorim, ose synojmë t’i zbatojmë në Mal të Zi në fushat e administratës publike, përmirësimin e arsimit, aksesin në kujdesin shëndetësor, mbrojtjen e mjedisit, ndryshimet klimatike dhe të dhënat hapësinore, do të ofrojnë një bazë dokumentacioni gjithëpërfshirës, do të krijojnë një mjedis më të mirë dhe do të rrisë dhe lehtësojë disponueshmërinë e informacionit dhe të dhënave publike për qytetarët, por edhe për partnerët e ardhshëm të biznesit.
„Bashkëpunimi ndërkombëtar, krijimi i një partneriteti për zhvillim, si dhe shkëmbimi i përvojës dhe njohurive janë thelbësore për forcimin e efekteve pozitive të transformimit digjital dhe të gjelbër për zhvillim të qëndrueshëm,“ përfundoi Novakoviq Gjuroviq.
