Parashikimi i madh pranveror i AccuWeather thotë se modeli afatgjatë i dimrit do të vazhdojë në disa vende evropiane, ndërsa disa pjesë të kontinentit tonë do të përballen me stuhi potencialisht të rrezikshme pak më vonë.
Sonte shënon fillimin astronomik të pranverës dhe ekipi i ekspertëve të parashikuesve ndërkombëtarë të AccuWeather ka publikuar detaje se si do të duket sezoni i ardhshëm i pranverës në Evropë. Sipas Meteo France, një brez prej 32 ditësh radhazi pa reshje të matshme (më pak se 1 mm shi në ditë) u regjistrua nga 20 janari 2023 deri më 21 shkurt 2023. Kjo vendosi një rekord të ri për vargun më të gjatë të njëpasnjëshëm të ditëve pa reshje të matshme që nga viti 1959.
E ndërsa ekziston frika për një thatësirë të mundshme për shkak të fenomeneve të tilla, stuhitë në Evropën Jugperëndimore dhe shtimi i reshjeve pranverore në rajonet jugore po shkaktojnë shqetësim te meteorologët për përmbytjet e mundshme në Itali dhe në Ballkan.
“Duke pasur parasysh se sa i ngrohtë është Mesdheu, stuhitë mund të ofrojnë lagështi shtesë dhe të çojnë në rritjen e kërcënimeve nga përmbytjet. Ky është një shqetësim i veçantë për shpatet perëndimore të Apenineve dhe Alpeve Dinarike,” tha Tyler Royce, meteorolog i lartë në AccuWeather .
Pjesa më e madhe e Evropës Juglindore, përfshirë edhe rajonin tonë, do të përballet me temperatura mbi mesataren në pjesën e dytë të pranverës. Nga Roma në Bukuresht, temperaturat e mesit të marsit ishin në të njëjtin nivel me ato tipike të fundit të prillit dhe kjo prirje ngrohëse do të vazhdojë gjatë muajve të ardhshëm me reshje të herëpashershme shiu. Një stuhi duhet të pritet edhe në Ballkan nga fundi i pranverës.
