Ndryshimet e propozuara në Ligjin për konfiskimin e përfitimeve pasurore të përfituara nga veprimtaria kriminale përmirësojnë ndjeshëm mjetet e prokurorisë dhe gjyqësorit në lidhje me konfiskimin e përhershëm të pasurisë së paligjshme, tha ministri i Drejtësisë Marko Kovaç, duke shtuar se kjo zgjidhje ligjore mund të jetë përmirësuar më tej.
Kovaç në seancën e Kuvendit tha se është arritur një marrëveshje joformale parimore që grupi punues i formuar në kuadër të Komisionit për Sistemin Politik, Gjyqësor dhe Administratë, të vazhdojë punën për të sqaruar të gjitha dilemat në periudhën e ardhshme.
Kovaç tha se është i kënaqur me diskutimin e sotëm në Kuvend dhe ekzistimin e vullnetit politik në drejtim të miratimit të ligjit.
“Me dorëzimin e projektligjit, Qeveria dhe Ministria e Drejtësisë kanë shprehur gatishmërinë e tyre për të përmirësuar instrumentet dhe mjetet ligjore në drejtim të konfiskimit të përfitimeve pasurore të fituara nga aktiviteti kriminal”, tha Kovaç.
Më herët, kryeministri i Malit të Zi Dritan Abazoviq tha në seancën e sotme të Kuvendit se ligji “antimafia” është krijuar për të qenë një mbështetje efektive për prokurorinë në konfiskimin e pasurisë së fituar me krim apo për të cilën nuk ka origjinë të qartë.
Ai theksoi se nuk është e vërtetë historia se disa ish-zyrtarë, biznesmenë apo politikanë nuk përfshihen në këtë ligj.
Kryeministri tha se Qeveria mbetet e hapur për të gjitha kritikat, sugjerimet dhe ndryshimet e mundshme që do ta bëjnë ligjin edhe më të mirë.
