Kryeministri i Malit të Zi Dritan Abazoviq kërkoi nga Ministria e Administratës Publike që të fillojë mbikëqyrja administrative në kryeqytet, ku ende nuk është krijuar qeveria. Nëse kjo është një hyrje për futjen e administratës së detyruar në Podgoricë, siç thekson ai, do të tregohet nga mbikëqyrja dhe mundësitë ligjore. “Ne nuk mundemi për shkak të vullnetit të një njeriu të lejojmë që të ndalet vullneti i qytetarëve të përcaktuar me Kushtetutë. Ne si qeveri duhet të shkojmë drejt mbikëqyrjes administrative në lidhje me kryeqytetin. Nëse kjo është një hyrje për futjen e administrimit të detyrueshëm do të tregohet nga mbikëqyrja dhe mundësitë ligjore. Prandaj i bëjmë apel Ministrisë së Administratës Publike që të bëjë atë mbikëqyrje, të konstatojë faktet dhe të ndërmarrë hapa të mëtejshëm në bazë të tyre. Nëse është e nevojshme të futet administrata e detyruar, do të futet”, tha Abazoviq në seancën e sotme të Qeverisë. Kur është fjala për Shavnikun, apeli i tij është që të ndalet praktika e mbajtjes së zgjedhjeve me dhunë çdo javë. “Komisioni Shtetëror i Zgjedhjeve të shohë se cilat janë mundësitë për shtyrjen e zgjedhjeve, për të caktuar një datë të re për zgjedhjet, për të kontrolluar listën zgjedhore, e cila ka mangësi, deri në atë datë dhe të hyjmë në procesin e ri zgjedhor me listë të pastruar zgjedhore”, ka theksuar Abazoviq. Ministri i Punëve të Brendshme Filip Axhiq theksoi se nuk kanë mundësi të kontrollojnë ata që ndërrojnë vendbanimin.
