Presidenti i Këshillit Evropian, Charles Michel, ka deklaruar se Bashkimi Evropian (BE) do të dorëzojë një përditësim mbi liberalizimin e vizave për Kosovën. Në një konferencë të përbashkët për media në Lubjanë me kryeministrin slloven, Robert Golob, përpara samitit BE-Ballkani Perëndimor që do të mbahet nesër në Tiranë, shefi i Këshillit Evropian tha se nesër do të japin më shumë informacion, duke theksuar më tej se “është bërë përparim”. “Ne mund të shohim se së fundmi janë bërë hapa të rëndësishme përpara. Nesër do të donim të kemi një deklaratë të përbashkët që do ta afrojë Ballkanin Perëndimor edhe më pranë BE-së”, tha Michel. Kosovë është ndër vendet e pakta në Evropë që është jashtë regjimit pa viza të BE-së. Javën e kaluar, ambasadorët e vendeve anëtare të BE-së u pajtuan t’i japin dritë jeshile bisedimeve të presidencës së Këshillit Evropian me Parlamentin Evropian për liberalizimin e vizave për Kosovën. Michel po ashtu njoftoi se samiti i nesërm në Tiranë do të ketë në agjendë krizat energjetike, luftën në Ukrainë dhe krizën e migracionit.
