Kryetari i Komunës së Tuzit, Nik Gjeloshaj, thotë se menaxhmenti i kompanisë “Plantacionet” po bën një persekutim kundër Komunës së Tuzit, për të fshehur qëllimin e vërtetë, që, siç shton ai, që prona shtetërore tu shitet privatëve me një çmim tepër të ulët. Komuna e Tuzit të mërkurën ka bllokuar llogarinë e Plantacioneve në vlerë prej 746.6 mijë euro në emër të tatimit në pronë për këtë vit, njofton kompania. “Rreth Plantacioneve u krijua një grup i organizuar kriminal, i cili punësoi një studio ligjore për të mbrojtur me ndikimin e saj në një media tezën se Komuna e Tuzit është fajtore për një lloj takse”, tha Gjeloshaj në reagimin e tij. Ai rikujton se Plantacionet janë pronë shtetërore e Malit të Zi. “Ne si komunë kemi vite që shpenzojmë burime të mëdha për të treguar drejtë dhe në mënyrë korekte vlerën e asaj pasurie shtetërore. Nga ana tjetër, kemi një grup të organizuar kriminal, i cili në vend që të mbrojë interesin shtetëror dhe publik, përpiqet të na bindë se është më mirë që shteti të ketë pasuri 105 milionë sesa 313 milionë. Për ta thënë në gjuhën popullore: dikush po tenton të vjedhë 208 milionë euro vetëm nga prona e Plantacioneve në Komunën e Tuzit”, thotë Gjeloshaj. “Deklaroj publikisht dhe qartëzi para gjithë Malit të Zi se do ju jem pengesë në ato plane të pista. Është e habitshme dhe e pabesueshme se si Prokuroria e Lartë e Shtetit e Malit të Zi nuk reagon fare, për të mbrojtur pronën shtetërore, para se ky grup i organizuar kriminal, duke iu referuar një kompanie të huaj vlerësuese, e cila vetë është distancuar nga ai vlerësim, të tjetërsohet”, shprehet Gjeloshaj. Ai shprehet se është e pabesueshme që pronarët e aksioneve të kapitalit shtetëror të mos reagojnë dhe si mjet i fundit i bën thirrje kryeministrit që me reagimin e tij të parandalojë planin e atij grupi. “Qëllimi përfundimtar është t’i shitet prona një privati për një shumë të vogël dhe të instalojë panele diellore në një sipërfaqe të madhe, përveç prodhimit primar, për të cilin njihet Plantacionet. Kjo e fundit mund të jetë një histori shumë e suksesshme, të cilën nuk duhet ta lejojmë një privat ta marrë për para të vogla, por ta marrë shteti i Malit të Zi. Nëse zotërinjtë nuk i kanë këto kapacitete dhe nuk dinë si ta bëjnë, unë sugjeroj që pronësinë dhe menaxhimin e Plantacioneve t’ia lënë Komunës së Tuzit, që të vertetohen se çfarë do të bëjmë me atë kompani pas disa viteve”, thotë Gjeloshaj.
