Edhe pse ishte planifikuar për sot, Komisioni Legjislativ nesër do të diskutojë propozimin e presidentit Millo Gjukanoviq për shkurtimin e mandatit të mbledhjes së 27-të të Kuvendit. Kryetarja e Komisionit, Maja Vukiçeviq, tha se presidenti për shkak të obligimeve nuk ka mundur të marrë pjesë në seancë, por se nesër do të mund të vijë në Kuvend. Prandaj, u vendos që nesër të diskutohet kjo pikë në rendin e ditës. Gjukanoviq në sqarimin e iniciativës ka thënë se nuk janë plotësuar kushtet për t’i besuar mandatin për përbërjen e Qeverisë liderit të Demos-it, Miodrag Lekiq. “Shkurtimi i mandatit të Kuvendit është zgjidhja më optimale në situatën e caktuar politike dhe se është në interesin më të mirë të të gjithë qytetarëve të Malit të Zi, sepse hap mundësinë e organizimit të zgjedhjeve të parakohshme parlamentare në një periudhë më të shkurtër kohore,“ tha Gjukanoviq. Kjo, beson ai, do të mundësojë zgjedhjen e një Qeverie që do të veprojë me kapacitet të plotë. Gjukanoviq theksoi se konteksti global rajonal dhe sfidat politiko-sigurore, problemet ekonomike dhe financiare të Malit të Zi, veçanërisht në sektorin e energjisë, shëndetësisë dhe fushave të tjera, kërkojnë një qeveri kompetente, të përgjegjshme dhe efikase.
