Mali i Zi duhet t’i kuptojë këto sulme kibernetike si një leksion nga i cili duhet të mësojmë dhe të dalim më të fortë me dituri për sfidat e ardhshme nga sulmet kibernetike, tha ministri i Administratës Publike Marash Dukaj. Dukaj ishte pjesëmarrës në panelin “Infrastruktura dhe shërbimet lidhëse: Si të sjellim infrastrukturën më bashkëkohore në Ballkanin Perëndimor” si pjesë e Samitit Digjital për Ballkanin Perëndimor – Prishtinë 2022. „Që nga 19 gushti, Mali i Zi është prekur nga sulme kibernetike ndaj infrastrukturës shtetërore të informacionit dhe rrjetit të autoriteteve shtetërore. Për shkak të ndërhyrjes në kohë të ekspertëve të Ministrisë së Administratës Publike dhe ndihmës së vendeve aleate të NATO-s, veçanërisht Francës, Britanisë dhe SHBA-së, nuk u shkaktuan dëme të përhershme në sistemet kyçe të infrastrukturës shtetërore,“ tha Dukaj. Ai theksoi se Mali i Zi duhet t’i kuptojë këto sulme kibernetike si një leksion nga i cili duhet të mësojmë dhe të dalim më të fortë me dituri për sfidat e ardhshme nga sulmet kibernetike. „Ajo që është më e rëndësishme është se investimet në sistemin e sigurisë kibernetike në Mal të Zi duhet të merren si prioritet, si dhe përmes bashkëpunimit me aleatët nga vendet e NATO-s, por edhe shkëmbimi i përvojave me Republikën e Kosovës, për të reformuar dhe përmirësuar krijimin e mekanizmave mbrojtës dhe parandalues nga sulmet e mundshme,“ tha Dukaj. Në prezantimin e mëtutjeshëm në panel, Dukaj ka theksuar se Mali i Zi ishte ndër të parët që nisi shërbimet komerciale 5G në Ballkanin Perëndimor. „Jetojmë në një kohë kur shpejtësia e transformimit digjital, pra përshtatja e proceseve të punës në ekonomi dhe ofrimi i shërbimeve nga administrata publike ndaj qytetarëve dhe ekonomisë, janë disa nga parakushtet bazë për zhvillimin e vendet tona. Suksesi në procesin e transformimit digjital është bërë një nga kriteret vendimtare me të cilat ne masim aftësinë e ekonomive tona për t’u përshtatur me tendencat e reja në aktivitetet ekonomike. Për këtë arsye, në Mal të Zi, ne njohëm zhvillimin digjital si një shans për sukses afatgjatë dhe prosperitet të gjithë shoqërisë sonë,“ tha Dukaj në panel.
