Deputetët e Parlamentit të Malit të Zi po shqyrtojnë propozimin për rezolutë në lidhje me agresionin ushtarak të Federatës Ruse kundër Ukrainës. Në emër të propozuesit Draginja Vuksanoviq Stankoviq, deputete nga Partia Socialdemokrate (PSD), tha se pret që rezolutën ta mbështesin më shumë se 41 deputetë. Kjo, siç theksoi ajo, do të tregojë qartë se kush do të jetë në anën e agresorit dhe kush do të jetë në anën e viktimës. Deputeti i Frontit Demokratik (FD), Sllaven Radunoviq tha se rezoluta e propozuar është një shembull tipik se si një temë komplekse trajtohet në mënyrë sipërfaqësore dhe të cekët, “në skaj të banalitetit politik”. Një nga drejtuesit e FD-së tha se nuk do të votonte për rezolutën e propozuar dhe deklaroi se propozuesit po u drejtoheshin ambasadave perëndimore. Përfaqësuesi i Partisë Demokratike të Socialistëve Danijel Zhivkoviq tha se rezoluta nuk është çështje politike por morale. “Kur përpiqeni t’i hiqni të drejtën për vetëvendosje dhe zgjedhjen e së ardhmes nga një komb apo shtet dhe në këtë mënyrë justifikoni ndërhyrjen ushtarake, kjo flet shumë për demokracinë që është aktualisht në fuqi në Rusi dhe për ata që nuk do ta mbështesin një rezolutë e tillë”, theksoi Zhivkoviq. Dragan Ivanoviq nga PSP tha se ai simpatizon qytetarët e Ukrainës dhe se i mbështet plotësisht të gjithë ata që kërkojnë të ndalojnë konfliktin. Deputeti demokrat Boris Bogdanoviq tha se rezoluta e propozuar është në përputhje me rezolutën e OKB-së, e cila është mbështetur nga vendet e Ballkanit Perëndimor. Srgjan Paviqeviq, deputet i koalicionit “E zeza mbi të bardhë”, theksoi se sot nuk bëhet fjalë për të mbajtur anën, por për të dënuar agresionin ushtarak. Kreu i klubit të Lëvizjes për Ndryshim, Branko Radulloviq, konsideron se është e neveritshme që Mali i Zi është i pari që ka miratuar një rezolutë të tillë, edhe pas Kombeve të Bashkuara. Deputeti i Partisë Boshnjake Sulo Mustafiq njoftoi se partia e tij do të mbështesë rezolutën. Deputetët e Malit të Zi nuk diskutuan sot ndryshimin e ligjit për hir të formimit të komunës së pavarur të Zetës. “Projektligji për ndryshime në ligjin për organizimin territorial të Malit të Zi dhe projektligji për ndryshimin e ligjit për kryeqytetin janë tërhequr nga procedura”, ka thënë kryetarja e Kuvendit, Danijela Gjuroviq.
