Mali i Zi dhe Kosova nuk kanë çështje të hapura dhe takimet e shpeshta në nivelin më të lartë kontribuojnë dukshëm në bashkëpunimin e ndërsjellë. “Detyrë e përbashkët është që në periudhën e ardhshme të konkretizohen projekte me interes të përbashkët në fushën e ekonomisë dhe transportit,” u konkludua në takimin e kryeministrit të Malit të Zi Dr. Dritan Abazoviq dhe Presidentes së Kosovës Vjosa Osmani. Sipas Qeverisë, në takim është vlerësuar edhe se është i nevojshëm përmirësimi i infrastrukturës së komunikacionit, ndërsa kryeministri Abazoviq ka theksuar se fokusi i Qeverisë së Malit të Zi në këtë kuptim do të jetë në rindërtimin e rrugës Plavë-Deçan dhe ndërtimi i tunelit Rozhajë-Pejë. Gjithashtu, u shpreh përkushtimi i të dyja palëve për të punuar për një zgjidhje të shpejtë të çështjes së korridorit ajror mes dy vendeve. Abazoviq theksoi se Mali i Zi ndjek një politikë gjithëpërfshirëse dhe se është sinqerisht i përkushtuar për çdo lloj bashkëpunimi rajonal, gjë që e ka dëshmuar disa herë deri më tani. “Në këtë drejtim, po bëhen përpjekje të vazhdueshme për të përmirësuar marrëdhëniet ekzistuese me të gjithë fqinjët, për të dhënë shtysë shtesë dhe për të hapur mundësi të reja për përparim demokratik, ekonomik dhe çdo përparim tjetër në rajon”, përfundoi ai. “Kosova vlerëson përpjekjet e Malit të Zi për të stabilizuar mundësitë rajonale. “Progresi juaj në fushën e integrimeve evropiane i jep shtysë perspektivës evropiane në Ballkanin Perëndimor”, tha presidentja e Kosovës Osmani.
