Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, organizon një darkë joformale me gjashtë liderët e Ballkanit Perëndimor. Tradita e mbajtjes së një darke të tillë nisi nga paraardhësja e Borrellit, Federica Mogherini, e cila takonte liderët e Ballkanit çdo vit në një darkë jozyrtare për të diskutuar për të ardhmen e rajonit dhe sfidat kryesore me të cilat përballet ai. Këtë vit, sipas njoftimit, në krye të agjendës do të jetë çështja e sigurisë në Europë, në sfondin e pushtimit të paprovokuar rus të Ukrainës. Pjesëmarrja në darkën në Bruksel e kanë konfirmuar: ministrja e Jashtme dhe e Diasporës e Kosovës, Donika Gërvalla, presidenti i Serbisë, Aleksandar Vuçic, kryeministri i Shqipërisë, Edi Rama, presidenti i Malit të Zi, Millo Gjukanovic, kryeministri i Maqedonisë së Veriut, Dimitar Kovaçevski, dhe kryesuesi i Këshillit të Ministrave të Bosnjë e Hercegovinës, Zoran Tegeltija. Kosova përfaqësohet me kryediplomaten Gërvalla, pasi presidentja e Kosovës, Vjosa Osmani, dhe kryeministri Albin Kurti, gjenden në vizitë në Shtetet e Bashkuara. Para darkës joformale, të gjithë pjesëmarrësit do të zhvillojnë bisedime të shkurtra dypalëshe me shefin e diplomacisë së bllokut evropian, Josep Borrell.
