Kryeministri i Malit të Zi, Zdravko Krivokapiq vlerësoi se projekti Evropa Tani është realisht i mundshëm dhe se është përgjegjësi e secilit deputet që ta votojë buxhetin për vitin e ardhshëm. „Atëherë qytetarët do ta kuptojnë se kush është pro e kush kundër,“ tha Krivokapiq. Paga minimale prej 650 euro, e propozuar nga Fronti Demokratik (FD), është aktualisht, sipas kryeministrit, vetëm një ëndërr. Ai në një konferencë për shtyp për buxhetin e vitit 2022 tha se po përpiqet të paraqitet si jofunksional dhe se nuk mund ta kuptojë se ka ndonjë deputet që do të votojë “kundër qytetarit të tij, pavarësisht nëse e voton atë apo jo”. “Çdo ndryshim buxheti në çdo kuptim prish konceptin bazë të të menduarit ekonomik. Buxheti u projektua me një deficit minimal që ishte i qëndrueshëm në 3.8 përqind,” tha Krivokapiq, duke vënë në dukje se çdo gjë tjetër e prish atë ekuilibër. Ai tha se kalkulatori me të cilin mund të llogaritet paga nëse miratohet programi Evropa që nga dje është vizituar nga më shumë se 95 mijë persona, sepse të gjithë duan të shohin se sa do të jetë paga e tyre nga muaji shkurt. “Ky plan realisht mund të realizohet në bazë të këtij kriteri – paga minimale e punës të jetë 450 euro. Gjithçka tjetër është në domenin e populizmit,” tha Krivokapiq.
