Politika e fqinjësisë së mirë, besimi i ndërsjellë dhe perspektiva evropiane janë karakteristikat e marrëdhënieve midis Malit të Zi dhe Republikës së Kosovës, u njoftua pas takimit midis Zëvendëskryeministrit të Malit të Zi Dritan Abazoviq dhe Ambasadorit të Republikës së Kosovës në Malin e Zi Ylber Hysa. Abazoviq dhe Hysa theksuan se Mali i Zi dhe Republika e Kosovës kanë marrëdhënie të mira të bazuara në respekt të ndërsjellë dhe një perspektivë të përbashkët. Abazoviq theksoi se e ardhmja e Ballkanit Perëndimor është në Bashkimin Evropian dhe Aleancë dhe se rajoni duhet të angazhohet edhe më fort për reformat e brendshme që do ta bëjnë Ballkanin Perëndimor një vend të qëndrueshëm ekonomikisht dhe të sigurt për të jetuar. “Duke theksuar se Mali i Zi është në dispozicion të Republikës së Kosovës kur bëhet fjalë për përvojat në integrimin Evropian dhe Euro-Atlantik, Abazoviq tregoi që rajoni i Ballkanit Perëndimor duhet të jetë edhe më i përkushtuar për integrim më të mirë ekonomik,” theksuan nga Zyra e Zëvendëskryeministrit. Abazoviq vuri në dukje rëndësinë e procesit të negociatave midis Beogradit dhe Prishtinës, i cili ka një rëndësi të madhe për stabilitetin në Ballkanin Perëndimor dhe është i bindur se dialogu është mënyra e vetme e mundshme për të zgjidhur dyshimet. Po ashtu, në takim u diskutua mbi rezultatet e imunizimit masiv të popullatës dhe rehabilitimi i pasojave të lëna nga pandemia Covid-19 në të gjithë rajonin.
