Presidenti i Shteteve të Bashkuara të Amerikës, Donald Trump, ka njoftuar se është arritur një marrëveshje që e cilësoi si historike për çarmatosjen e plotë të Hamasit dhe grupeve të tjera të armatosura në Gaza.
Përmes një postimi në Facebook, Trump tha se kjo marrëveshje përbën një hap të rëndësishëm drejt paqes dhe sigurisë së qëndrueshme në rajon, duke theksuar se ajo parasheh krijimin e një qeverie të re palestineze që do të bashkëpunojë me një strukturë të quajtur “Bordi i Paqes”.
Sipas tij, marrëveshja do të zbatohet në faza të strukturuara, ku paralelisht me procesin e çarmatosjes do të tërhiqen edhe forcat izraelite, ndërsa një forcë ndërkombëtare stabilizimi dhe një polici e re palestineze do të marrin përgjegjësinë për sigurinë në Gaza.
Trump theksoi se ky zhvillim është pjesë e zbatimit të “Planit 20-pikësh Trump” dhe vjen pas një periudhe të gjatë konflikti, që përfshinte luftë të ashpër, krizë humanitare dhe mbajtje pengjesh.
Ai falënderoi ndërmjetësit ndërkombëtarë, përfshirë Egjiptin, Katarin dhe Turqinë, për rolin e tyre në arritjen e kësaj marrëveshjeje, duke shtuar se kërcënimet nga Gaza nuk do të lejohen të përsëriten.
Konfirmimi për marrëveshjen ka ardhur edhe nga drejtues të Hamasit. Ghazi Hamad, anëtar i delegacionit negociator të grupit palestinez, deklaroi se Hamasi mbetet i përkushtuar ndaj objektivave të tij kombëtare dhe mbrojtjes së të drejtave të popullit palestinez.
Ai theksoi se çështja e armëve është e lidhur me elementë të tjerë të marrëveshjes, përfshirë tërheqjen e Izraelit nga Rripi i Gazës dhe procesin e rindërtimit.
“Nuk do të ndërmarrim asnjë veprim nëse forcat pushtuese nuk respektojnë detyrimet e parashikuara në marrëveshje”, u shpreh Hamad.
