Foto: Shutterstock
Paga mesatare neto në Mal të Zi gjatë muajit qershor 2026 ishte 1.036 euro, duke shënuar një rritje prej 0,3% krahasuar me muajin maj dhe 2,6% më shumë në krahasim me të njëjtin muaj të vitit të kaluar, sipas të dhënave të MONSTAT-it.
Paga mesatare bruto arriti në 1.237 euro, ndërsa rritja nominale e pagave u ndikua nga përmirësimet në disa sektorë të ekonomisë.
Megjithatë, për shkak se çmimet e konsumit u rritën me 0,4% gjatë qershorit, fuqia reale blerëse e pagave u ul me 0,1% në raport me muajin paraprak.
Sipas statistikave, rritja më e madhe e pagave u regjistrua në sektorin e ndërtimtarisë (1,5%), pasuar nga nxjerrja e xeheve dhe gurit (1,1%) dhe shërbimet administrative dhe ndihmëse (1%).
Rritje pati gjithashtu në aktivitetet profesionale, shkencore dhe teknike, në sektorin e akomodimit dhe ushqimit, tregti, financa, administratë publike, shëndetësi dhe transport.
Nga ana tjetër, ulje të pagave u evidentuan në shërbimet e tjera (-1%), aktivitetet artistike dhe rekreative (-0,7%), si dhe në industrinë përpunuese (-0,5%).
Rënie më të vogla u regjistruan edhe në bujqësi, menaxhimin e ujërave, furnizimin me energji elektrike dhe në arsim.
