Rritja e pagave mund të pritet në fund të vitit, përkatësisht në tremujorin e tretë apo të katërt, përmes ndryshimeve në Ligjin për pagat në sektorin publik, u tha gazetarëve ministri i Financave Novica Vukoviq, duke komentuar kërkesat e sindikatave të arsimit, shëndetësisë, administratës dhe gjyqësorit.
Vukoviq tha gjithashtu se Qeveria nuk është e shqetësuar për favorizimin e fushave individuale të administratës publike, kështu që çështja e të gjitha atyre rritjeve do të zgjidhet përmes Ligjit për paga, për të cilin tashmë është duke u punuar.
“Në këtë mënyrë, përmes të gjitha strategjive dhe politikave që duhet të zbatohen këtë vit, do të bëhet një politikë adekuate e pagave dhe thjesht do të jetë në kënaqësinë e përgjithshme të kolegëve të administratës publike, qytetarëve të Malit të Zi si dhe vetë administratës shtetërore. Pra, ne flasim për durim, diku flasim për tremujorin e tretë, të katërt dhe kjo ishte kërkesa për sindikatat. Në anën tjetër, u takon atyre që ta pranojnë një qasje kaq të drejtë, a do të ngadalësojnë punën institucionet në të cilat janë dhe do të vazhdojnë me aktivitetet e tyre që i kanë quajtur grevë?”, tha ministri Vukoviq.
Kryeministri Millojko Spajiq tha se mësimdhënësit duhet t’i besojnë Qeverisë dhe të kenë durim derisa të zbatohet programi Evropa Tani 2.
Ai tha se i vlerësojnë mësimdhënësit dhe e kuptojnë pozitën e vështirë në të cilën ndodhen.
“Ne jemi gjithashtu të vetëdijshëm për rezultatet shumë të dobëta të testit PISA të nxënësve, të cilat janë shqetësuese, ndaj duhet të merremi me një reformë të thellë në arsim”, shtoi Spajiq.
Ai tha se shëndetësia ka qenë prioritet kur kanë zbatuar programin Evropa Tani 1, por tani arsimi, administrata tatimore dhe shumë aktivitete të tjera janë lënë pas dore.
„Ata duhet t’i besojnë Qeverisë së re. Mendoj se kemi dhënë shumë rezultate në dy muaj e gjysmë – tre. Ky është vetëm fillimi. Jo vetëm mësimdhënësit, por të gjithë qytetarët e Malit të Zi mund të presin një vit shumë të ndritshëm”, shtoi Spajiq.
Ai tha se nuk ka nevojë për nxitim, kërcënime dhe shantazhe.
