Ndryshimet në Ligjin për Vetëqeverisje Lokale, me të cilat do të përmirësohet decentralizimi, duhet të heqin të gjitha mangësitë dhe zbrazëtirat ligjore që krijuan probleme për të gjithë në praktikë, tha sot ministri i Administratës Publike Marash Dukaj.
Dukaj dhe kolegët e tij sot kanë mbajtur mëngjes pune me kryetarët e vetëqeverisjes lokale.
“Ministria e Administratës Publike po mendon në mënyrë strategjike për krijimin e një sistemi të vetëqeverisjes lokale, i cili do të ketë potencial për të ofruar shërbim cilësor për qytetarët dhe ekonominë. Në fund të vitit 2022 kemi filluar punën për përgatitjen e analizës në mënyrë gjithëpërfshirëse dhe të hapur. Qëllimi kryesor është njohja e qartë e problemeve me të cilat ballafaqohen çdo ditë komunat dhe jo vetëm komunat por edhe qytetarët”, tha Dukaj.
Ai theksoi se në dhjetor të vitit 2023 ka filluar procesi dhe është publikuar një thirrje publike për konsultime dhe është formuar Grupi Punues për ndryshime në Ligjin për Vetëqeverisje Lokale, që do të përmirësojë decentralizimin.
“Ky ligj duhet të heqë të gjitha mangësitë dhe zbrazëtirat ligjore që na shkaktuan probleme të gjithëve në praktikë. Prandaj ju ftoj ta hapim këtë temë së bashku sot. Më pas mund të paraqisni të gjitha sugjerimet tuaja ose të na tregoni problemet me të cilat po përballeni, në mënyrë që Mali i Zi të marrë një ligj modern që është në përputhje me të gjitha parimet evropiane. Qëllimi ynë i përbashkët është përmirësimi i vetëqeverisjes lokale në përputhje me standardet evropiane”, ka theksuar ministri Dukaj.
