Foto: Risto Božović
Zëvendëssekretarja e përgjithshme e Unionit të Sindikatave të Lira të Malit të Zi, Ivana Mihajlloviq, në protestën e mbajtur sot në Podgoricë deklaroi se sindikata nuk do të tërhiqet nga kërkesat për rritjen e pagave për të gjithë të punësuarit në sektorin publik dhe privat.
Sipas saj, kjo duhet të realizohet përmes nënshkrimit të një Marrëveshjeje të re të Përgjithshme Kolektive.
Protesta u organizua për shkak të pakënaqësisë ndaj mënyrës se si Qeveria po sillet ndaj dialogut social dhe ndaj kërkesave të sindikatave.
Unioni i Sindikatave të Lira të Malit të Zi kërkon që vlera e koeficientit për llogaritjen e pagave të rritet nga 90 në 100 euro, çka do të sillte rritje të pagave me rreth 10 për qind.
Ata theksojnë se kjo vlerë nuk është ndryshuar prej 13 vitesh, pavarësisht inflacionit dhe rritjes së kostos së jetesës.
Mihajlloviq kritikoi Qeverinë për injorimin e partnerëve socialë dhe tha se punëtorët kanë në anën e tyre drejtësinë, vendosmërinë dhe unitetin.
Ajo paralajmëroi se, nëse kërkesat vazhdojnë të shpërfillen, protestat do të jenë edhe më të fuqishme.
Në protestë morën pjesë edhe përfaqësues të sindikatave të arsimit, shëndetësisë, kulturës dhe policisë.
Ata thanë se me paga të ulëta vendi rrezikon largimin e të rinjve dhe mungesën e punëtorëve në sektorët kryesorë.
Marrëveshja aktuale Kolektive skadon nesër dhe prej saj varen të drejtat e rreth 100 mijë të punësuarve që nuk mbulohen nga marrëveshje sektoriale.
