Në shkollat në Mal të Zi janë krijuar kushte që mësimi të zgjasë 45 minuta në vitin e ri shkollor, por Ministria e Arsimit do t’i respektojë rekomandimet e organeve shëndetësore, tha ministri përkatës Miomir Vojinoviq. Në një intervistë me titull Viti i ri shkollor – çfarë na pret dhe a jemi gati, ai tha se beson se kjo është mënyra e vetme e mundshme për të kthyer deri në një masë atë që ka humbur duke shkurtuar orët e mësimit në 30 minuta. “Në këtë moment janë krijuar kushtet që mësimi të fillojë ashtu siç e kemi planifikuar, por do të duhet të respektojmë zërin e profesionit, Institutit për Shëndet Publik dhe Ministrisë së Shëndetësisë”, tha Vojinoviq. Siç theksoi ai, Ministria është e obliguar të ndjekë atë që është e para, që është shëndeti i nxënësve.
