Zëvendëskryeministri i Qeverisë së Malit të Zi, ministër i Zhvillimit Ekonomik dhe njëherësh lider i Forumit Shqiptar, Nik Gjeloshaj, ka uruar Prokurorin e ri Suprem të Shtetit Millorad Markoviq, si dhe parlamentin, i cili me votën e 3/4 të deputetëve mori një nga vendimet më të rëndësishme që priste Mali i Zi i qytetëruar.
“Nënshkruesve të marrëveshjes për formimin e mazhorancës qeverisëse mund t’u besohen shumë gjëra, por rezultatet janë të padiskutueshme, kjo shumicë parlamentare solli stabilitet dhe shpresë në Mal të Zi! Në më pak se njëqind ditë arritëm të bëjmë kaq shumë gjëra të rëndësishme për perspektivën evropiane të Malit të Zi. Nga mbajtja e regjistrimit, përmes rritjes së pensionit minimal e deri te vendimi i sotëm për zgjedhjen e Prokurorit Suprem të Shtetit, dhe kjo pas pesë vitesh, një nga institucionet më të rëndësishme ka qenë pa drejtues”, ka bërë të ditur Gjeloshaj.
Ai tha se “është gjithnjë e më shumë krenar për vendimin e tij nga tetori 2023 për të qenë pjesë e mazhorancës aktuale”.
“Në atë moment si kryetar i komunës në fillim të mandatit vendosa të marr përgjegjësi personale dhe politike pasi i takon bartësit të listës zgjedhore dhe t’i jap mbështetje shumicës së re parlamentare për formimin e Qeverisë së 44-të. Sot, vetëm në ditën e 88-të të mandatit tonë, mund të them vetëm se cilado qoftë perspektiva (e imja apo e mazhorancës aktuale), jam krenar për vendimet e mia dhe rezultatet që kemi arritur për një Mal të Zi më të mirë dhe evropian”, theksoi Gjeloshaj.
