Një ushqim i lehtë, i shpejtë, por mbi të gjitha i përgatitur në shtëpi edhe i shëndetshëm, kiflet janë padyshim mënyra më e mirë për të mbledhur gjithë familjen rreth tryezës së ngrënies në orët e para të mëngjesit.
AgroWeb.org ju përcjell më poshtë një recetë fantastike të kifleve me djathë, e cila përgatitet krejt lehtë dhe shpejtë në shtëpi.
Nëse dëshironi mbushjen e kifleve mund ta bëni edhe me përbërës të tjerë me spinaq apo edhe gjizë apo t’i përgatisni ato të ëmbla.
Në rastin e kifleve të ëmbla gjatë përgatitjes së brumit duhet të hidhni pak sheqer në vend të kripës dhe mbushjen mund ta bëni me reçelra të ndryshëm apo edhe çokollatë.
Përgatitja e Kifleve me Djathë në Shtëpi
Përbërësit
- 500 gr miell
- Kripë
- 150 gr gjalpë
- Një filxhan çaji kos
- 3 të verdha vezësh
- Djathë i bardhë i thërmuar
- Rigon
Përgatitja
Si fillim hedhim në një tas të madh miellin, gjalpin dhe kripën. I kalojmë të gjitha në mikser derisa të jenë përzjerë mirë me njëra tjetrën.
Më pas shtojmë të verdhat e vezëve bashkë me kosin dhe vijojmë t’i përzjejmë në mikser derisa brumi të jetë i njëtrajtshëm.
E hedhim brumin në një enë tjetër dhe e punojmë me dorë për disa minuta.
Më pas, AgroWeb.org ju këshillon që brumin ta mbështillni me një pecetë kuzhine dhe lëreni të pushojë për 30 minuta në frigorifer.
E nxjerrim nga frigoriferi dhe e hollojmë në formën e petës në një trashësi prej 2 mm.
Më pas, petën e presim në forma trekëndore. Në secilin prej trekëndëshat hedhim nga një lugë djathë të thërmuar të përzier me pak rigon.
I mbyllim në formën e roleve duke shtypur me kujdes të dyja anët e kifleve.
I vendosim në tavë ku më parë kemi shtruar një letër pjekjeje.
Pasi i kemi vendosur të gjithë me radhë në tavë, kiflet i fusim në furrë të ngrohur në 180 gradë dhe sipër nëse preferoni mund t’i lyeni me të verdhë veze.
I pjekim për 25 minuta, i nxjerrim nga furra dhe i lëmë të ftohen. Sipas preferencës, para se t’i shërbejmë i spërkasim me pak fara susami sipër./AgroWeb.org
