Mali i Zi do të mbështesë edhe Planin Kombëtar të Rimëkëmbjes së Ukrainës, tha kryetarja e Parlamentit të Malit të Zi, Danijela Gjuroviq, dhe shprehu gatishmërinë e vendit tonë që, në përputhje me mundësitë modeste, të vazhdojë të ofrojë ndihmë financiare dhe materiale për Ukrainën. Këtë ajo e ka thënë në Zagreb, ku po merr pjesë në Samitin e Parë Parlamentar të Platformës Ndërkombëtare të Krimesë, të organizuar nga Parlamenti kroat dhe Rada Verkhovna e Ukrainës. Kryetarja e Kuvendit të Malit të Zi, Danijela Gjuroviq, mori pjesë në këtë ngjarje të rëndësishme ndërkombëtare dhe prezantoi qëndrimin e Malit të Zi për çështjen më aktuale botërore për momentin. Duke iu drejtuar të pranishmëve, Gjuroviq, siç thuhet në njoftim, theksoi se mbështet idenë e vendosjes së dimensionit parlamentar të Platformës Ndërkombëtare të Krimesë, si një mekanizëm i ri që mund të japë një kontribut të fuqishëm në realizimin e qëllimeve të kësaj Platforme. Ajo shtoi se mbështetja e qartë e Malit të Zi për Ukrainën dhe popullin ukrainas shprehet më së miri përmes miratimit të Rezolutës për dënimin e agresionit ushtarak rus kundër Ukrainës, e cila u miratua nga një shumicë e madhe e deputetëve të Parlamentit të Malit të Zi. Duke theksuar se Mali i Zi është vendi i parë jashtë BE-së që ka miratuar Vendimin që mundëson mbrojtjen e përkohshme të personave nga Ukraina për një periudhë njëvjeçare, si dhe lehtësimin e hyrjes në vend për arsye humanitare, Kryetarja e Kuvendit tha se sot Mali i Zi është një strehë e sigurt për rreth njëmbëdhjetë mijë ukrainas, që është pak më pak se dy përqind e popullsisë sonë totale.
