Kryetari i Komitetit Ushtarak të Aleancës së NATO-s, Admirali Rob Bauer, me ftesë të shefit të Shtabit të Përgjithshëm të Ushtrisë së Malit të Zi, gjeneral brigade Zoran Lazareviq, më 23 dhe 24 janar zhvilloi një vizitë zyrtare në Mal të Zi.
Në një bisedë me nënkryetarin e Qeverisë së Malit të Zi Alleksa Beçiq dhe ministrin e Mbrojtjes Dragan Krapoviq, Bauer vlerësoi Malin e Zi për kontributin e dhënë në Aleancë.
“Gjatë shtatë viteve të fundit, Mali i Zi është bërë një aleat i çmuar dhe i vlefshëm në NATO, duke dhënë shumë kontribute për sigurinë tonë të përbashkët, duke përfshirë misionet tona në Kosovë dhe Irak, si dhe grupet tona luftarake shumëkombëshe në Bullgari dhe Letoni. Kjo tregon se Mali i Zi është një vend që merr përgjegjësi për sigurinë tonë të përbashkët”, theksoi ai.
Në një takim me presidentin e Malit të Zi, Jakov Millatoviq, ai vuri në dukje vendimin e fundit të qeverisë malazeze për rritjen e shpenzimeve për mbrojtjen kombëtare në standardin e NATO-s, që është dy për qind e buxhetit të përgjithshëm.
“Mbrojtja kolektive fillon me një mbrojtje të fortë kombëtare. Prandaj është e rëndësishme që ne të forcojmë aftësitë tona ushtarake dhe kjo mund të bëhet vetëm me më shumë shpenzime për mbrojtjen. Kjo rritje do të përkthehet në investime më të mëdha në mbrojtje, veçanërisht në pajisje të reja të mëdha. Një mbrojtje më e fortë kombëtare krijon një aleancë edhe më të fortë”, shtoi Bauer.
“Gjatë vizitës Admirali Bauer mbajti edhe një leksion para studentëve, fakulteteve dhe personelit ushtarak të Universitetit të Donja Goricës. Në fjalimin e tij, ai theksoi ndryshimet thelbësore në sigurinë tonë globale, duke trajtuar ndikimin e luftës së paligjshme dhe brutale të Rusisë kundër Ukrainës, si dhe përgjigjen e NATO-s me parandalim dhe mbrojtje të shtuar”, përfundon deklarata.
