Presidenti i Malit të Zi, Jakov Millatoviq, apeloi që të mos ndryshohet Ligji i Përgjithshëm për Arsimin, i cili parasheh që bordet e shkollave të zgjedhin drejtorët e shkollave.
Millatoviq paraprakisht ia ktheu Kuvendit për rivendim Ligjin për ndryshimin e Ligjit të Përgjithshëm për Arsimin dhe deputetët do ta votojnë sërish në seancën e 5 shtatorit.
Në një deklaratë për media, ai kujton se Kuvendi ka miratuar ndryshimet në Ligjin për Arsimin, me të cilat përcaktohet se drejtorët e shkollave zgjedhen dhe shkarkohen nga ministri, në vend të bordit të shkollës, siç është përcaktuar me Ligjin e mëparshëm.
“Apeloj që zgjidhja ligjore ku shkollat zgjedhin drejtorët e tyre të mbetet në fuqi dhe të punojmë së bashku për ta përmirësuar atë në mënyrë që të bëjmë një hap përpara, jo një hap prapa”, tha Presidenti.
Ai vlerësoi se ndryshimet e propozuara rikthejnë një praktikë të keqe, se drejtorët e shkollave do të zgjidhen sipas linjave partiake dhe do t’i nënshtrohen kuotave partiake dhe tregtisë.
Siç tha Millatoviq, duke pasur parasysh se sistemi arsimor është një nga shtyllat më të rëndësishme të shoqërisë sonë, rikthimi i tij nën kontrollin politik është një hap mbrapa.
Ai theksoi se Ligji është ndryshuar pa diskutim paraprak publik dhe përfshirje të ekspertëve dhe opinionit të interesuar, gjë që sipas tij fatkeqësisht është bërë rregull.
