Të paktën katër persona janë vrarë dhe 35 fëmijë janë plagosur në një sulm me dron ukrainas gjatë natës në një konvikt studentësh në rajonin e Luhanskut, i cili kontrollohet nga Rusia në Ukrainën lindore, sipas autoriteteve ruse.
Agjencia Reuters nuk ka mundur të verifikojë në mënyrë të pavarur ngjarjen dhe Ukraina nuk ka dhënë ende një reagim zyrtar.
Autoritetet ruse thonë se në ndërtesë po flinin 86 adoleshentë të moshës 14–18 vjeç kur ndodhi sulmi.
Zyrtarë të instaluar nga Rusia në Luhansk thanë se disa persona janë nxjerrë nga rrënojat dhe se kërkimet për të mbijetuar të tjerë vazhdojnë.
Nga ana tjetër, një ditë më parë Ukraina ka deklaruar se ka kryer sulme ndaj forcave ruse në territoret e pushtuara, duke pretenduar viktima të shumta, përfshirë dhjetëra të vrarë në sulme me dron në kamp trajnimi dhe në objekte ushtarake ruse. Këto pretendime nuk janë verifikuar në mënyrë të pavarur.
