NATO po shqyrton mundësinë e dërgimit të një misioni ushtarak në Ngushticën e Hormuzit për të mbrojtur transportin detar tregtar, në kushtet kur bllokada e vazhdueshme po thellon krizën energjetike globale dhe po ndikon në ekonomitë perëndimore.
Sipas burimeve të cituara nga Bloomberg, disa shtete anëtare mbështesin idenë e një misioni për sigurimin e lundrimit, por ende nuk ka konsensus brenda Aleancës, pasi disa vende janë të kujdesshme për përfshirje në konfliktin SHBA–Izrael–Iran.
Ngushtica e Hormuzit, përmes së cilës kalon rreth një e pesta e naftës dhe gazit botëror, mbetet e bllokuar, duke shkaktuar rritje të çmimeve të energjisë dhe pasoja ekonomike globale.
Udhëheqësit e NATO-s pritet të diskutojnë këtë çështje në një samit në Ankara, ndërsa zyrtarët theksojnë se fillimisht duhet vendim politik para çdo plani ushtarak formal.
Disa vende anëtare kanë shprehur kundërshtime, ndërsa të tjera kanë ofruar mbështetje logjistike për operacione të mundshme. Situata mbetet e paqartë dhe NATO ende nuk ka marrë vendim përfundimtar për një ndërhyrje në rajon.
