Ka qenë i drejtpërdrejtë në mesazhin e përcjellë gjatë një fjalimi para deputetëve në Parlamentin Eropian, kryeministri i Malit të Zi Dritan Abazoviq, të mbajtur pas një numri të madh të takimeve. “Rajoni ka nevojë të shohë se dyert e BE-së janë të hapura për vendet që meritojnë të jenë pjesë e bllokut. Ne nuk duhet ta shikojmë Ballkanin Perëndimor si një vrimë të zezë në Europë. Duhet ta dini se nëse qëndrojmë jashtë Europës, Ballkani do të bëhet Ukraina e re pas disa vitesh, dhe nuk besoj se dikush në Bashkimin Europian mund ta dëshirojë një gjë të tillë”, është shprehur ai. Abazoviq theksoi se Evropa është në një fazë të re për shkak të agresionit ushtarak rus në Ukrainë dhe se është e nevojshme të merren vendime të shpejta dhe të zgjuara, ndërsa foli dhe për ekzekutivin e ri të Malit të Zi, të drejtuar prej tij. “Kjo qeveri është krijuar me një mesazh të qartë dhe synim për të ecur më shpejt në integrimet europiane. Unë mendoj se këto janë momente historike jo vetëm për Malin e Zi, por për të gjithë Europën. Pas 24 shkurtit, fillimi i pushtimit rus të Ukrainës bota është ndryshe dhe më shumë se kurrë njerëzit në Mal të Zi, rajon dhe Europë e kuptojnë se ne duhet të jemi bashkë.” Abazoviq nënvizoi gjithashtu se objektivi i kësaj qeverie është ta zhvendosë vëmendjen nga temat negative, si nacionalizmi dhe përçarjet, tek problemet që shqetësojnë realisht qytetarët.
