Foto: Ilustrim
Inflacioni në Evropë gjatë vitit 2026 po tregon dallime të mëdha mes shteteve, sipas të dhënave të publikuara nga Visual Capitalist.
Në disa vende të Evropës Juglindore inflacioni është më i lartë, me Rumaninë në krye me rreth 9%, ndërsa Kosova dhe Bullgaria kanë norma mbi 6%.
Në të kundërt, në pjesën më të madhe të Evropës Perëndimore inflacioni është më i ulët, zakonisht mes 2% dhe 4%.
Në këtë kuadër, Mali i Zi renditet nën mesataren evropiane, në grupin e vendeve me rritje më të moderuar të çmimeve krahasuar me disa vende të rajonit.
Shtetet me inflacionin më të ulët janë Zvicra, Danimarka, Suedia dhe Republika Çeke, ku inflacioni është rreth ose nën 2%, afër objektivave të bankave qendrore. Këto dallime lidhen me varësinë nga importet, strukturën e tregjeve dhe politikat ekonomike të ndryshme në shtetet evropiane.
Edhe pse inflacioni në Evropë është stabilizuar krahasuar me vitet e kaluara, çmimet vazhdojnë të mbeten të larta në shumë vende.
Ekonomitë e mëdha evropiane vazhdojnë të kenë inflacion mbi objektivat e bankave qendrore: Franca rreth 2.5%, Gjermania 2.9% dhe Mbretëria e Bashkuar 3.3%.
Rritja e kostos së jetesës lidhet pjesërisht me çmimet e energjisë dhe tensionet gjeopolitike, përfshirë konfliktet në Ukrainë dhe Iran.
