Deputetët sot miratuan dy nga tre ligjet që presidenti i Malit të Zi, Jakov Millatoviq, i ktheu për rishqyrtim.
Me votat e shumicës u rimiratua Ligji për financimin e vetëqeverisjes lokale.
Kuvendi me shumicë votash miratoi edhe Ligjin për ndryshimin e ligjit për shoqëritë afariste.
Para votimit protestuan deputetët e Lëvizjes Qytetare URA, duke theksuar se projektligji është një tentativë për të poshtëruar dhomën legjislative.
Presidenti Millatoviq e ktheu projektligjin për ndryshime në Ligjin për Komunikime Elektronike, por dje nënkryetarja e Kuvendit të Malit të Zi, Zdenka Popoviq e tërhoqi atë nga procedura parlamentare.
Ai ligj nuk u miratua sot.
“Pas konsultimeve dhe diskutimeve me zëvendëskryeministrin e Qeverisë së Malit të Zi për Siguri, Politikë të Brendshme, Evropiane dhe Punë të Jashtme Alleksa Beçiq, zëvendëskryeministrin e Qeverisë dhe njëherësh ministër i Zhvillimit Ekonomik Nik Gjeloshaj, si dhe ministren për Çështje Evropiane, Maida Gorçeviq, dhe duke pasur parasysh qëndrimin e Komisionit Evropian, si propozues i autorizuar e tërheq Propozimin për Ligjin për Komunikimet Elektronike”, ka thënë Popoviq.
Siç shpjegoi ajo, pavarësisht se mendon se është një zgjidhje e mirë ligjore, me dëshirën për t’i dhënë pak kohë Komisionit Evropian për të mësuar mbi avantazhet e këtij ligji, ajo e tërheq këtë propozim për të mos lejuar subjektet politike brenda vendit për të manipuluar pikëpamjet e Komisionit Evropian.
