Ministrja e Arsimit, Shkencës dhe Inovacionit të Malit të Zi, Angjella Jakshiq-Stojanoviq, mori pjesë në Forumin e katërt Global të UNESCO-s në Riad, kushtuar etikës së inteligjencës artificiale. Gjatë forumit, ajo diskutoi mbi zhvillimin dhe përdorimin e IA-së, rolin e arsimit dhe zhvillimin e aftësive njerëzore në sistemet arsimore të së ardhmes. Jakshiq-Stojanoviq prezantoi përparimin e Malit të Zi në digjitalizimin e arsimit, pajisjen e shkollave me teknologji moderne, laboratorët EdTech, STEM dhe robotikë, si dhe konceptin e Shkollës Digjitale dhe kornizat e kompetencave për IA për nxënësit dhe mësuesit. Ajo theksoi gjithashtu rëndësinë e trajnimit të vazhdueshëm për përdorim të sigurt dhe kritik të mjeteve të inteligjencës artificiale.
