Foto: UNICEF
Një raport i quajtur Disrupting Harm, i prezantuar në Podgoricë, tregon se rreth një në dhjetë fëmijë të moshës 12–17 vjeç në Mal të Zi që përdorin internetin ka përjetuar një formë të shfrytëzimit ose abuzimit seksual përmes teknologjive digjitale.
Studimi është realizuar nga UNICEF Innocenti, ECPAT International dhe INTERPOL, me mbështetjen e organizatës Safe Online dhe në bashkëpunim me Qeverinë e Malit të Zi, si pjesë e një hulumtimi global në 25 vende.
Raporti thekson nevojën për forcimin e ligjeve, parandalimin dhe rritjen e edukimit digjital, mediatik dhe për inteligjencën artificiale në familje.
Gjithashtu kërkohen mekanizma më të sigurt dhe më të përshtatshëm për fëmijët për raportimin e rasteve dhe një mjedis më i sigurt online.
Sipas gjetjeve, në 66% të rasteve abuzuesi ka qenë dikush i njohur për fëmijën (si bashkëmoshatar ose anëtar familjeje), ndërsa në 59% të rasteve fëmijët nuk e kanë raportuar incidentin, shpesh për shkak të turpit ose mungesës së vetëdijes se është problem serioz.
Në 82% të rasteve, ngjarjet kanë përfshirë rrjete sociale.
Raporti gjithashtu paralajmëron se teknologjitë e reja, përfshirë inteligjencën artificiale, po përdoren për krijimin e përmbajtjeve të rreme seksuale me fëmijë, duke rritur rrezikun dhe kompleksitetin e problemit.
UNICEF dhe partnerët bëjnë thirrje për veprime urgjente: edukim më të mirë për sigurinë online, përfshirje të prindërve, forcim të ligjeve dhe platformave digjitale, si dhe bashkëpunim më të madh institucional për të mbrojtur fëmijët në hapësirën digjitale.
