Deputetët në Kuvendin e Malit të Zi kanë aktualizuar sot problemin e furnizimit me ujë në vendbanimin Rakiq.
Deputeti i PDS-së, Nermin Abdiq, tha se e ka për obligim që këtë problem ta trajtojë në Parlament.
“240 familje nuk kanë ujë në kushte kaq të vështira atmosferike. Një alarm i kuq i motit është në fuqi. Pyesim veten nëse kemi ndonjë prioritet. Çfarë do të bëjmë nëse dikujt i ndodh diçka? Kërkoj reagim të menjëhershëm nga organet kompetente. Ky është një sulm ndaj dinjitetit njerëzor. Nëse nuk zgjidhet në 48 orët e ardhshme, unë do të jem në krye të atyre për të protestuar. Është i nevojshëm një reagim urgjent i Qeverisë së Malit të Zi”, tha ai.
Abdiq tha se ne kemi ushtrinë, sektorin e policisë, zjarrfikësin dhe se të gjithë mund të ndihmojnë. “Dikush po luan në mënyrë të rrezikshme me jetët e njerëzve”, tha ai.
Zëvendëskryetarja e Kuvendit të Malit të Zi, Zdenka Popoviq, i ka bërë thirrje Ujësjellësit dhe Qeverisë për zgjidhjen e problemit.
Popoviq tha se Ujësjellësi ishte në duart e PDS-së deri në vitin 2020.
“Ju e dini se sa apele ka pasur për të punuar në instalimet hidroteknike në vendbanimet përreth Podgoricës,” tha ajo.
Deputeti i Forumit Shqiptar, Nikollë Camaj paralajmëroi se situata është alarmante por se kjo nuk është hera e parë.
“Komuna e Tuzit është duke bërë gjithçka që është e mundur në këtë moment, duke çuar ujin me cisterna, në mënyrë që qytetarët të kenë ujë për nevoja themelore. Po bëhen përpjekje për përmirësimin e furnizimit me ujë. Në këtë moment i bashkohem çdo apeli për të ndihmuar këta qytetarë”, tha ndër të tjera deputeti Camaj.
