Foto: Shutterstock
Raportuesja e Asamblesë Parlamentare të Këshillit të Evropës për dialogun post-monitorues me Malin e Zi, Lilijana Tangi, ka vlerësuar përkushtimin e vazhdueshëm të elitës politike dhe shoqërisë malazeze ndaj vlerave evropiane në fushën e sundimit të ligjit, të drejtave të njeriut dhe institucioneve demokratike. A
jo deklaroi se procesi i negociatave për anëtarësimin në Bashkimin Evropian ka hyrë në një fazë dinamike përfundimtare, duke theksuar se Mali i Zi po punon intensivisht për harmonizimin e legjislacionit dhe procedurave administrative me standardet evropiane.
Tangi theksoi se aktualisht po trajtohen ligje të rëndësishme që lidhen me pavarësinë e gjyqtarëve dhe prokurorëve, punët e brendshme dhe shërbimet e sigurisë kombëtare.
Gjatë vizitës së saj në Podgoricë nga 9 deri më 12 qershor, ajo zhvilloi takime me zyrtarë të lartë shtetërorë, përfaqësues të institucioneve të drejtësisë, deputetë, si dhe me përfaqësues të pakicave dhe organizatave joqeveritare.
Raportuesit pritet që në shtator t’i paraqesin Komitetit të Monitorimit të APKE-së gjetjet e tyre të detajuara, në bazë të të cilave do të vendoset nëse do të rekomandohet përfundimi i dialogut post-monitorues me Malin e Zi, i cili zgjat prej më shumë se dhjetë vitesh.
