Papa Françesku dënoi “egërsinë dhe mizorinë” e trupave ruse në Ukrainë, ndërsa vlerësoi “heroizmin” dhe “guximin” e ukrainasve për të mbrojtur tokën e tyre. “Ajo që po shohim është brutaliteti dhe egërsia me të cilën po zhvillohet kjo luftë nga trupat, përgjithësisht mercenarët, të përdorur nga rusët,” tha Papa në një bisedë me anëtarët e medias jezuite, e cila u zhvillua muajin e kaluar dhe u publikua më 14 qershor. Papa Françesku u tha gazetarëve se Rusia mendonte se lufta do të përfundonte brenda një jave, “por ata e llogaritën gabim”. “Ata takuan një popull trim, një popull që po lufton për të mbijetuar dhe që ka një histori lufte”, tha ai. Ndërsa kritikoi ashpër pushtimin e Rusisë, Françesku këmbënguli gjithashtu se nuk kishte “djem të mirë dhe të këqij” dhe se Rusia në një farë mënyre ishte provokuar nga zgjerimi i NATO-s në lindje. Kreu 85-vjeçar i Vatikanit tha se disa diplomatë e kuptonin se kishte shenja se një konflikt po afrohej në horizont. Në të njëjtën kohë, Françesku vazhdoi gjerësisht duke lavdëruar guximin e ukrainasve dhe ripohoi të drejtën e tyre për t’u mbrojtur, ndërsa dënoi ato që ai tha se ishin interesat financiare në luftë nga prodhuesit e armëve për të “testuar dhe shitur armë”.
